之前forum 咪有人問邊個試過發夢"訓醒", 跟住原來醒多一次先真係醒, 今朝我就係咁啦, 訓醒既時候發覺自己個頭訓左過隔離床, 即刻訓返過自己個邊, 跟住係床上面腆左一輪, 突然醒覺雖然我地係拍L字床, 但係其實兩張床係冇真正拍埋, 中間仲有個電視, 我跟本冇可能可以好舒服咁訓左過隔離, 所以頭先一定係發夢, 但係至於幾時先係真醒個一刻, 我真係分唔清, 真係真真假假, 假假真真.
今日照原定計劃到Camden 行下, 點知天有不測之風雲, 正想出門時竟然落雹...Camden Market 其實就好似女人街, 不過佢賣d野毫無特色, 不外T恤飾物翻版袋, 不值一提.
相反一過Camden Canal, 所有野即刻唔同曬, 貨品雖然無甚特別, 但係運河流水淙淙, 兩岸柳垂, 小船蕩漾. 只要越過水閘上面既小橋, 就黎到Canal Market. Canal Market 由一堆兩層紅磚小屋組成, 小屋下層係餐廳, 小屋之間既空地就係大大小小既熟食檔, 小屋上層就係精品店家品店, 連串既小鐵橋將二樓空間連接起來, 又會通到中心double height 既arcade, 遊人可以穿梭其中, 路路亦通, 有時間都要研究下個市場格局.經過一檔賣Donut 既買左一個勁大勁朱古力既Donut.
相通既仲有Stable Market, 睇名都知前身就係馬廄, 有一條美食街, 去過既人好多都讚, 但係食之前個Donut 都飽曬. Stable Market 最正就係係Horse Hospital 既antique market, 其中一檔比起其他賣china, 吊燈, old print o個d傳統野與別不同, 特別印象深刻, 賣既係歐洲工業革命時期既電器, 收音機, 電熱爐, 檯燈, 多士爐, 坐地大風扇, 金屬加素色塑膠既經典material配搭, 簡約透明既金屬機能美, 極盡Bauhaus 之味. 相信有研究既人對老電器品牌, 出廠處應有更深了解. 此時又激起我遊德國Dussendolf 既衝動.
後來走到大街被一間自稱Best antique store in London 既大舖吸引住, 唔係因為佢自己話best, 而係一望入去真係好靚, 裏面大部份都係天然材料做的東方或非洲工藝品, 已且勝在任玩唔嬲, 齋搞唔買絕冇問題, 銅片石頭樂器隨便亂敲, 佛像惡人像放心摸摸.的而且確香港人冇足夠地方, 冇足夠品味, 冇足夠氣量, 冇足夠閑情去擁有一處閑適而又有活力的地方.
沒有留言:
發佈留言